هرات کې د پاسپورت ادارې دوه کارکوونکي د فساد په تور نیول شوي

د هرات د پاسپورت ادارې دوه کارکوونکي د کمېشن کارۍ، جعل کارۍ او غير اصولي فعاليتونو په تور نيول شوي دي. د کورنيو چارو وزارت وايي ياد دوه تنه د امنيتي منسوبينو له لوري نيول شوي او له دندو ګوښه شوي دي. د يادو کسانو د هويت او دغه راز د هغوی فعاليتونو په تړاو جزيات نه دي خپاره شوی خو تر دې وړاندې په ځلونو د پاسپورټ رياست اړوندو ادارو کې د فساد او فساد ته د لارې برابرولو په موخه د کمکارۍ ادعاوې شوې وې. د کورنيو چارو وزارت وايي چې له فساد سره مبارزه کې جدي دي له همدې کبله يې په تېرو څو مياشتو کې يوازې د هرات د پاسپورټ ادارې ۲۲ کارکوونکي او منسوبين د جعل کارۍ او کمېشن کارۍ په تور نيولي چې عدلي او قضايي ارګانونو ته ور پېژندل شوي دي.