پیام د لوړو زده کړو خصوصي موسسې د لومړي ځل لپاره خپلې چارې په ۱۳۹۱ لمریز کال کې پیل کړې دي. د لوړو زده کړو د دې موسسې مؤسس ښاغلی عبدالکریم منصور وایي، چې له پیل سره سم یې د لوړو زده کړو وزارت په منظورۍ دوه پوهنځي (اقتصاد او حقوق او سیاسي علوم) درلودل، محصلین یې ورته جذب کړل او عملاً یې په دې برخه ګې فعالیت پیل کړ. ښاغلی منصور وایي، اوسمهال پیام د لوړو زده کړو خصوصي موسسه درې پوهنځي (حقوق او سیاسي علوم، اقتصاد او شرعیات.) لري. دی وایي چې د څلورم پوهنځي چې هغه کمپیوټر ساینس دی د منظورۍ کارونه یې هم بشپړ کړي او په نږدې راتلونکې کې به په رسمي ډول دغه پوهنځی هم د موسسې په چوکاټ کې ور زیات کړي او محصلین به ورته جذب کړي.
په پیام د لوړو زده کړو موسسه کې اوسمهال د ۱۰۵۰ په شاوخوا کې محصلین په دریو پوهنځیو کې پر لوړو زده کړو بوخت دي. ښاغلی عبدالکریم منصور وایي، چې د محصلینو په دې ډله کې شل سلنه یې ښځینه او پاتې اتیا سلنه نارینه دي. د ښاغلي منصور په خبره، په روانه اونۍ کې یې اوومه دوره محصلین فارغېږي. دی وایي، دوی په اقتصاد او شرعیاتو پوهنځي کې د څوارلسم پاسو محصلینو د جذب اجازه هم لري، نو له همدې کبله یې تر اوسه پورې په څه باندې اوو کلونو کې اووه دورې محصلین فارغ کړي دي. نوموړی زیاتوي چې تر اوسه پورې یې د اتو سوو کسانو په شاوخوا کې محصلین له خپلو فعالو پوهنځیو څخه د لېسانس په کچه فارغ کړي او ټولنې ته یې د خدمت په موخه وړاندې کړي دي. ښاغلی منصور وایي چې ډېری محصلین یې په په مرکز او د هېواد په ولایتونو کې په بېلابېلو دولتي او غیر دولتي ادارو کې پر کار بوخت دي.
د پیام د لوړو زده کړو خصوصي موسسې، مؤسس ښاغلی عبدالکریم منصور وایي، چې هر کال یې د جذب کچه توپیر کوي، ځکه دغه څه د هېواد په امنیتي او اقتصادي وضعیت پورې تړلې خبره ده. هغه وایي، دوی په کال کې دوه ځله د کانکور اخیستو اجازه لري او په هر ځل له ۳۰۰ تر ۵۰۰ کسانو څخه د کانکور ازموینه اخلي، چې له ډلې یې نږدې د ۴۰۰ په شاوخوا کې نوي محصلین جذبوي.
ښاغلی عبدالکریم منصور وایي چې د هېواد اقتصادي وضعیت ته په کتو، دوی هر کال خپلو محصلینو ته ځانګړی تخفیف ورکوي، څو وکولای شي خپلو لوړو زده کړو ته ادامه ورکړي. دی وایي، په ۱۳۹۶ لمریز کال کې یې نږدې ۱۵۷ محصلینو ته په ۹۰ سلنه تخفیف په پیام د لوړو زده کړو موسسه کې د زده کړو زمینه برابره کړه او دوی ته یې دغه تخفیف د پوره تحصیلي دورې لپاره ورکړی و. هغه وایي چې پیام د لوړو زده کړو خصوصي موسسه، د خصوصي پوهنتونونو په کتار کې لومړنۍ هغه ده چې محصلینو ته د زده کړو په برخه کې د پام وړ تخفیف ورکوي. د دې تر څنګ، د لوړو زده کړو دغه موسسه د خپلو محصلینو لپاره څلوېښت، پنځوس، شپېته او اویا سلنه تخفیفونه هم لري.
پیام د لوړو زده کړو موسسه د مناسب موقعیت تر څنګ، د خپلو محصلینو لپاره مجهز کتابتون لري، چې په دغه کتابتون کې ډېر بېلابېل کتابونه موجود دي او محصلین کولای شي له دغه کتابتون څخه د خپلې مطالعې او څېړنې لپاره ګټه واخلي. ښاغلی منصور وایي چې د کتابتون تر څنګ دغه موسسه د خپلو محصلینو لپاره کمپیوټر لب لري، چې په انټرنېټ هم سمبال دی. دی وایي، کمپیوټر لب یې څلورویشت ساعته د خپلو محصلینو او استادانو په واک کې ورکړی دی، څو وکولای شي له انټرنېټ څخه یې ګټه واخلي. پیام د لوړو زده کړو موسسه کې د تدریس چارې د ځینو فعالو او تجربه لرونکو استادانو له خوا مخ ته وړل کېږي چې د دوکتورا او ماسټرۍ تر کچې پورې لوړې زده کړې لري او په اړونده برخه کې د تدریس له کافي تجربې څخه برخمن دي.
د لوړو زده کړو دغه موسسه تر اوسه پورې له کوم بهرني پوهنتون سره د علمي اړیکو کومه هوکړه نه لري، خو ښاغلی عبدالکریم منصور وایي، چې هڅه کوي، د لوړو زده کړو وزارت د قوانینو په چوکاټ کې له ځینو بهرنیو پوهنتونونو سره د علمي اړیکو هوکړې لاسلیک کړي چې له مخې یې وکولای شي خپل محصلین او استادان د لا نورو لوړو زده کړو، تجربې تر لاسه کولو او وړتیاوو لوړولو لپاره دغو پوهنتونونو ته ور واستوي او له تجربو یې ګټه واخلي. دی وایي چې په کور د ننه له دولتي او خصوصي پوهنتونونو سره ښې او نیکې اړیکې لري، چې ښه بېلګه یې څو میاشتې مخکې د (د خصوصي پوهنتونونو د ارتقاع ظرفیت) په نوم د یوه- دوه ورځني کنفرانس جوړول وو، چې د پیام د لوړو زده کړو خصوصي موسسې له خوا جوړ شوی و او نږدې د څوارلس خصوصي پوهنتونونو استازو پکې ګډون کړی و. په دغه موسسه کې د ورځې درې وخته تدریس کېږي او محصلین د زده کړو لپاره ورځي.
ښاغلی منصور وایي، کله چې محصل خپله د لېسانس دوره پای ته رسوي، نو اړ دی چې په اړونده برخه کې مونوګراف ولیکي او له خپل مونو ګراف څخه دفاع وکړي. دی وایي، له دفاع څه وروسته د محصل څلور کلنې نمرې د مونوګراف له یوې کاپي سره لوړو زده کړو وزارت ته استول کېږي، چې تر ارزونې وروسته محصلینو ته د نمرو ترانسکرېپ او د لوړو زده کړو وزارت له لوري تایید شوې تصدیق پاڼه ورکول کېږي او محصلین کولای شي له دې تحصیلي اسنادو څخه د دندې په پیدا کولو او یا هم نورو لوړو زده کړو په برخه کې ترې ګټه واخلي. خو دا چې خصوصي پوهنتونونو ته په خپل نوبت د ډیپلومونو د وېش لړۍ پیلېږي، نو تر اوسه پورې یې فارغ شویو محصلینو ته ډیپلومونه نه دي ورکړي، خو هڅه کوي چې کله ورته د ډیپلومونو د وېش وار ورسېږي، فارغ شویو محصلینو ته به ډيپلومونه هم ورکړي.
په پیام د لوړو زده کړو خصوصي موسسه کې د نظري زده کړو تر څنګ، محصلینو ته د علمي زده کړو زمینه هم برابرېږي. ښاغلی منصور وایي چې د حقوقو او سیاسي علومو د پوهنځي محصلینو ته وخت ناوخت تمثیلي محکمې جوړوي، چې محصلین او مېلمانه یې د تمثیلي محکمو له کار څخه خورا خوښ دي. د دې تر څنګ، دوی هڅه کوي چې د نورو پوهنځیو د محصلینو لپاره هم د عملي کار زمینه برابره کړي، څو یې په اړونده برخه کې تجربه او وړتیا لوړه شي. نوموړی وایي، د محصلینو لپاره د ورکشاپونو او سیمینارونو جوړول هم د دوی له لومړیتوبونو څخه دي.
د پیام د لوړو زده کړو موسسې، مؤسس ښاغلی عبدالکریم منصور وایي، چې د لوړو زده کړو وزارت له لوري د کیفیت د تضمین چې درې پړاونه لري، لومړنی پړاو یې په پوره بریاليتوب سره تېر کړی دی او هیلمن دی چې له دوو نورو پړاونو څخه په بریالیتوب را ووځي، نو له هغه وروسته به د نویو پوهنځیو په تاسیس لاس پورې کوي. له موسسې څخه به پوهنتون ته ارتقاع کوي او هڅه به یې دا وي چې په کور د ننه او سیمه ییزه کچه اعتبار خپل کړي او تر څنګ یې د ماسټرۍ پروګرام هم پیل کړي.
ښاغلی منصور وایي، د افغانستان امنیتي او اقتصادي وضعیت ته په کتو، موږ ټول په ډېری برخو کې ستونزې لرو، خو له ځینو څخه یې بیا داسې یادونه کوي: (پوهنتون باید څلورویشت ساعته برېښنا ولري، چې دوی یې نه لري او په کومو ساعتونو کې چې برېښنا لري هم، په لوړو بیه ور باندې پلورل کېږي. دی وایي، مالیې وزارت له یوه تولیدي شرکت او پوهنتون څخه په یوه کچه مالیه اخلي، په داسې حال کې چې تولیدي شرکتونه سل سلنه ګټه کوي، خو پوهنتونونه د یو څه ګټې تر څنګ، د هېواد په ابادۍ کې برخه اخلي، د خلکو بچیان روزي او په دې برخه کې ډېر لګښت کوي. ښاغلی منصور وایي، پر زده کړو پانګونه د هېواد پر روښانه راتلونکې باندې پانګونه ده او له پوهې پرته موږ هېڅ کله دایمي سولې او ثبات ته نه شو رسېدلی.»
د خصوصي پوهنتونونو اتحادیه له لوړو زده کړو وزارت او په ټوله کې له افغان حکومت څخه غواړي چې خصوصي پوهنتونونو ته د متوازن پرمختګ زمینه برابره کړي، څو هم دغه پوهنتونونه پر خپلو پښو ودرېږي او هم پر کار پوه، مسلکي او هېوادپال کسان وروزي او ټولنې ته یې د خدمت په موخه وړاندې کړي.