امریکا: افغانستان کې د م.م له ماموریت بشپړ ملاتړ کوو

امریکا وایي په افغانستان کې د ملګرو ملتونو د ماموریت له دوام ملاتړ کوي. په ملګرو ملتونو کې د امریکا دایمي استازې د افغانستان لپاره د ملګرو ملتونو د نوې استازې د دندې مبارکي ویلې ده او وایي دوی له دغه نړیوالې ادارې سره همکار دي. په ورته وخت کې د افغانستان لپاره د امریکا ځانګړي استازي هم په ټوېټ پیغامونو کې ویلي، دوی تمه لري چې ملګري ملتونه له افغانانو سره خپلو مرستو ته ادامه ورکړي او په خبره یې امریکا د ملګرو ملتونو د ماموریت بشپړ ملاتړ کوي. ټوماس وېسټ له نوې استازې غوښتي چې له اړمنو افغانانو سره مرستې ډېرې کړي او په دې سختو شرایطو کې یې لاسنیوی وکړي.