په بهرنیو هېوادونو کې د افغان کډوالو په ملاتړ او د ایران ضد لاریونونو په دوام په واشنګټن او لندن کې هم افغانانو د ایران ضد شعارونه ورکړي دي. په واشنګټن او لندن کې مېشتو لسګونه افغانانو له نړیوالو غوښتي چې د ایران د کړنو پر وړاندې غږ اوچت کړي. په لندن کې سلګونه افغانان راټول شوي وو، د ایران د سفارت په مخ کې یې لاریون کړی و او ددغه هېواد پر ضد یې شعارونه ورکول. ددوی په خبره ایران ټول بشري او انساني حقوق تر پښو لاندې کړي دي او نړیوال باید پوښتنه ترې وکړي. په واشنګتن کې هم د ایران ضد لاریونوالو له نړیوالو ادارو وغوښتل چې سیند ته د افغان کډوالو د غورځولو او اور اچولو په اړه باید تحقیقات وشي او له ایران دې ددې جنایتونو پوښتنه وشي.
