پاکستان له افغانستان سره پر دوامداره او عملي تعامل ټینګار کړی

د پاکستان د بهرنیو چارو وزیر بلاول بوټو زرداري له افغانستان سره پر دوامداره او عملي تعامل ټینګار کړی. زرداري د شانګهای د همکارۍ سازمان د چارواکو په ۲۱ مه غونډه کې د وینا پر مهال ویلي، چې د افغانستان له خلکو سره د بشري او اقتصادي بحران پر وړاندې د مبارزې په برخه کې د مرستې لپاره بايد له دغه هېواد سره تعامل وشي. هغه دغه راز په سیمه کې د باثباته سولې او امنیت په راوستلو او له ترهګرۍ سره پر مبارزې هم ټینګار کړی دی. په ورته مهال اسلامي امارت وايي چې د ځینو هېوادونو نه تعامل به د افغانستان پر خلکو منفي اغېز وکړي. بلخوا د پاکستان لومړي وزير شهباز شريف له چیني چارواکو سره  په کتنه کې ویلي، چې یو سوله ییز او باثباته افغانستان به د سیمې امنیت او اقتصادي پرمختګ ته وده ورکړي. دواړو خواوو افغانستان ته د CPEC پروژې غځول هم مهم بللي دي.