افغان سوداګر قیوم ګل عظیمي څه باندې شل کالو راهيسې د چین په «يي وو» ښار کې کار و بار کړی او کوي يې او دی په چين کې ډېر بلد شوی او ترې راضي دی.
هغه څو ورځې مخکې د يي وو بازار د جوړېدو د ۴۰مې کالیزې په مناسبت په وتلو ۴۰ سوداګرو کې وشمېرل شو او په دې ۴۰ وتلو سوداګرو کې دوه بهرني سوداګر شته، چې یو عظیمي او یو بل د نور هېواد وګړی دی. هغه په دې اړه د چین ميډيا ګروپ له خبریالې سره په مرکه کې وویل، چې ډېر خوشحاله دی او دا د چین د پرانیستې تګلارې ښکارندويې کوي او په چین کې د دوی اوږدې مودې هڅو او کوښښونو نتیجه ورکړې ده.
ښاغلي عظیمي وویل، چین په نړۍ کې یو غټ هېواد دی او ستر بازار لري. دغه هېواد له څه د پاسه ۴۰ کلونو راهيسې د ورخلاصون تګلاره پلې کړې او د ده په شان بهرني سوداګر په دې ډېر خوښ دي او ډېرې ګټې يې ترلاسه کړې دي. دی وايي: کله چې زه په ۱۹۹۸م کال کې چین ته راغلم، که څه هم هغه وخت په چيني ژبه هېڅ نه پوهېدم، خو د يي وو بازار ما ته دروازه پرانیسته او دلته مې ډېر ژر سوداګرۍ پيل کړه.
عظیمي زیاتوي چې په يي وو ښار کې يې له څه وخت کار وروسته خپل شرکت جوړ کړ او خپلې معاملې يې ډېرې پراخې کړي. هغه وویل، د چین د ورخلاصون تګلارې او برابر سوداګریز چاپېریال بهرنیو شخصي سوداګرو ته ډېر ګټور فرصتونه برابر کړي. اوس هغه نه یوازې د افغانستان په شمول لسګونو هېوادونو ته د چین تولیدات صادروي، بلکې له افغانستان او ترکیې څخه باکیفیته توکي چیني بازار ته واردوي.
نوموړي په ۲۰۱۹م کال کې په يي وو ښار کې د بهرنیانو لپاره د لومړۍ دورې د استوګنې ۵ کلن لیسانس تر لاسه کړ. عظیمي وویل، چې د دې لیسانس په لرلو سره يې کار او ژوند ته ډېرې اسانتیاوې برابرې شوې دي.
چین د دسمبر په لومړۍ نېټه له افغانستان څخه د ۹۸ سلنې تولیداتو ګمرکي مالیه صفر کړې. عظیمي په دې اړه وویل، چې هغه د چین دغه تګلاره ډېره اغېزمنه ګڼي، په دې سره به چین ته د افغانستان د لا نورو زیاتو توکو د واردېدو او په افغانستان کې د تولیداتو د چمتو کولو لارې چارې وهڅول شي. برسيره پر دې به د چین دغه تګلاره ډېرو زیاتو افغان سوداګرو او کارکوونګو ته ګټور فرصتونه برابر کړي.
اوس چین په عمده توګه له افغانستان څخه د جلغوزو، زعفران او نورو وچو میوو په شمول ځیني زراغتي محصولات واردوي، خو دواړه هېوادونه د کرنیزو تولیداتو او انرژۍ په برخو کې د همکارۍ لا نوربالقوه ځواک لري.
د چین د دولت رئیس شي جین پينګ څو ځلې پر دې ټينګار کړی، چې چین به په دوامداره توګه خپلې دروازې د نړۍ پرمخ پرانيزي او د پرانيستي اقتصاد کچه به نوره لوړه کړي. د عظیمي په اند، چین د افغانستان پر صادراتو د ماليې په صفر کول، د يي وو ښار ځايي حکومت بهرنیو سوداګرو ته جایزه ورکول، ټول د رئیس شي جين پينګ د ویناوو د ثبوت ښکارندويي کوي.
نوموړي په راتلونکی کې د افغانستان او چین ترمنځ د سوداګریزې همکارۍ په اړه داسې ویلي، چې هیله ده د دواړو هېوادونو ترمنځ ټرافيکي لارې نورې هوارې وي او په دې سره به د دواړو هېوادونو د خلکو تګ راتګ او معاملې نورې زیاتې شي.
