امریکا کې د واورې او یخنۍ له امله د مړو شمېر ۶۰ ته ورسېد

په امریکا کې د سختې یخنۍ، واورې او توفان له امله د مړو شویو کسانو شمېر له ۶۰ څخه اوښتی بلخوا زرگونه پروازونه لغوه ميليونونه خلک له برېښنا بې برخې شوې دي. د ځايي چارواکو په وینا په نیویارک ایالت کې حالت ډېر خراب دی او په شمالي بفيلو سيمه کې په ساعتونو ساعتونو واورين توفان روان وي چې لاره نه ليدل کېږي. د امریکا د ژغورنې ادارې چارواکي وايي د خلکو مړي پر سړکونو په نښتو موټرو کې او تر پنډ واورو لاندې موندل کېږي خو د زیاتې واورې له امله ددوی کارونه ټکني شوي دي. دوی زیاتوي د نیویارک په بفېلو سیمه کې دوه نیم متره واوره ورېدلې او په ټول ښار کې تګ راتګ په بشپړه توګه بند شوی دی. د بېړنیو چارو اداره وايي چې تر اوسه په بېلا بېلو ايالتونو کې تر ۶۰ پورې کسان مړه شوي او میلیونونه کسان زيانمن شوي دي. د امریکا د بیړنیو حالاتو سره د مبارزې ادارې ویلي چې تر اوسه تر ۱۵ زرو ډیر پروازونه لغوه شوي او ميليونونه کسان له برېښنا بې برخې شوې دي.