عامې روغتیا وزارت ټول هغه راپورونه رد کړي چې ګواکي د مصنوعي تنفس دستګاوې یا وینټلاټورونه له افغانستان پاکستان ته قاچاق شوي دي. ددغه وزارت چارواکو نن په یوه خبري کنفرانس کې د خبرو پر مهال وویل چې دوی محدود شمېر وینټلاټورونه لري او ټول د دوی په روغتونونو کې شته دي او د ناروغانو لپاره کارول کېږي. ددغه وزارت په خبره په دې تړاو هغه راپورونه چې ګواکي یاد طبي وسایل پاکستان ته قاچاق شوي ناسم دي. سرچینې پر رسنیو غږ کړی چې په دې حساسو شرایطو کې دې په خپلو راپورونو کې دقت کوي او په ورته ګنګوسو دې عامه ذهنیت نه مخشوشوي. بلخوا د ولسمشر لومړي مرستیال امرالله صالح هم د رسنیو پر راپور غبرګون ښودلی دی او په وینا یې د وینټلاټورونو د قاچاق په تړاو خپاره شوي راپورونه ناسم دي. دده په وینا عامه ذهنیتونه دې په دغه ډول بې اساسه راپورونو نه مخشوشېږي. پرون ځینې رسنیو راپورونه خپاره کړل چې د مصنوعي تنفس ځينې دستګاوې پاکستان ته لېږدول شوې دي، چې دا مسئله د خلکو له توند غبرګون سره مخ شوه او په دې تړاو یې د پلټنو غوښتنه کوله.
