پاکستان اروپایي هېوادونو کې افغانانو ته دویزې ورکړه بنده کړه

د پاکستان د بهرنیو چارو وزارت اروپایي هېوادونو کې خپلو سفارتونو او قونسلګریو ته لارښوونه کړې چې تر بل حکمه پورې دې افغانانو ته ویزې نه ورکوي. د پاکستان د بهرنیو چارو وزارت لخوا په دې اړه یو مکتوب په ټولنیزو شبکو کې ډیر لاندې باندې کېږي چې پرې د ۲۰۲۳ زیږدیز کال د فېبرورۍ اتمه نېټه لیکل شوې ده. خو په دې مکتوب کې د دغه کار لامل نه دی په ډاګه شوی. بلخوا ځینو پاکستانیو رسنیو خبر ورکړی چې د بهرنیو چارو وزارت دغه اقدام وروسته له هغه  کړی چې په سویډن کې د پاکستان سفارت شاوخوا ۱۶۰۰ افغانانو ته د هغوی په جعلي اسنادو ویزې ورکړې دي. د پاکستان ټوډې په نامه یوې رسنۍ د پاکستان د بهرنیو چارو وزارت د چارواکو په حواله خبر ورکړی چې د یادې قضیې په اړه یې پراخې پلټنې پیل کړې دي. دغه راز د پاکستان د بهرنیو چارو وزارت اړوندو سفارتونو ته سپارښتنه کړې چې ورکړل شوې ویزې بېرته راټولې او لغوه یې کړي. د افغانستان سرپرست حکومت تر اوسه په دې اړه څه نه دي ویلي.