عاطف مشعل: پاکستان کې د افغان کډوال د سپکاوي قضیه به تر پایه وڅارو

پاکستان کې د افغانستان سفیر عاطف مشعل وایي، په پېښور کې د مېشت افغان کډوال عامر تهکالي د بې عزتۍ قضیه به د یاد هېواد په عدلي او قضایي ادارو کې تر پایه وڅاري. نوموړي پاکستاني رسنیو سره خبرو کې ویلي، چې د پاکستاني پولیسو له لوري له افغان کډوال سره د ناوړه چلن، ربړونې او د انساني کرامت خلاف قضیه یې تر جدي څار او غور لاندې ده. مشعل زیاته کړې، پاکستاني حکومت ورته ویلي چې په پېښه کې تورن کسان یې نیولي او پوښتنې ګروېږنې یې ترې پیل کړې دي. د یادونې ده چې د عامر تهکالي په نوم پېښور کې مېشت افغان کډوال په ټولنیزو رسنیو پاکستاني پولیس ښکنځلي وو چې د روانې اوونۍ په پیل کې پېښور کې پولیسو نیولی او لوڅې ویډیوګانې یې ترې کړې وې چې په ټولنیزو رسنیو کې یې د لر او بر افغانانو توند غبرګونونه له ځان سره لرل.