نېکلسون: د ا.ا کړنو د سرپرست حکومت د رسميت پېژندلو مسئله ځنډولې ده

د افغانستان لپاره د اروپايي ټولنې ځانګړی استازی توماس نېکلسون وايي، سرپرست حکومت باید د ټاکنو او لویې جرګې له لارې د خلکو ملاتړ ثابت کړي. نوموړی وايي، د ا.ا کړنو د سرپرست حکومت د رسميت پېژندلو مسئله ځنډولې ده. نېکلسون له طلوع نیوز سره په مرکه کې ویلي اوسني چارواکي باید ثابته کړي چې د خلکو ملاتړ لري او دا کار د ټاکنو او لويې جرګې له لارې کېدلای شي. نوموړی وايي، چې د سرپرست حکومت له چارواکو سره يې د ښځو د کار، زده‌کړو، بشري حقونو، امنيت او ټول‌ګډونه حکومت په اړه خبرې کړې دي. بلخوا د ا.ا ویاند وايي چې سرپرست حکومت د خلکو پراخ ملاتړ لري او د ټاکنو یا کوم بل پروګرام تر سره کولو ته اړتیا نشته. نوموړی وايي، اوسني حکومت د رسميت پېژندنې لپاره ټول شرایط پوره کړي، خو ځینې ډلې هڅه کوي چې په افغانستان کې د خپلو مداخلو لپاره ځای ومومي.