امریکا د افغانانو لپاره د بشر دوستانه ویزو بهیر بیا پيلوي

د امریکا د کورني امنیت وزارت وایي په شرایطو برابرو افغان کډوالو لپاره چې د بشردوستانه ویزو له لارې ورغلي، دا بهیر بیا پیلوي تر څو دا افغانان وکړای شي په امریکا کې په قانوني توګه ژوند او کار وکړي. دې وزارت په یوې اعلامیې ویلي هغه افغانان چې د بشردوستانه ویزو له لارې امریکا ته تللي د روان ۲۰۲۳ کال د جون په میاشت کې کولی شي چې په آنلاین بڼه د بیا پیرول کېدو لپاره غوښتنې وسپاري. په اعلامیې کې ویل شوي چې د پیرول د لومړي بهیر په څېر به دا ځل هم هره قضیه په جلا جلا توګه د عاجلو بشري دلایلو او مهمو عامه ګټو په نظر کې نیولو سره طی مراحل کیږي. وزارت ویلي چې په دې هکله معلومات به ژر خپاره کړي خو د نېټې په هکله یې څه نه دي ویلي. د کورني امنیت وزارت په اعلامیې کې ویل شوي چې د ولسمشر جو بایډن حکومت د هغو زرګونو افغانانو خوندیتوب، امنیت او سلامتیا دوام ته ژمن دی چې د متحدینو ښه راغلاست عملیاتو له مخې امریکا ته ورغلي او د “دوامدار ښه راغلاست” پروګرام له مخې به دا چارې روانې ساتي.