سېلابونو په ننګرهار کې څلور تنه ماشومان مړه کړي

د ننګرهار ولایتي چارواکو ویلي، چې په دې ولایت کې د تېرې شپې سېلابونو خلکو ته د ځاني زیانونو ترڅنګ ګڼ مالي زیانونه هم اړولي دي. د ننګرهار ولایت مقام څخه په خپره شوې خبر پاڼه کې ویل شوي، چې د یاد ولایت په کامې ولسوالۍ کې تېره شپه سخت سیلابونه راوتلي دي. چې له امله یې څلور تنه ماشومانو خپل ژوند له لاسه ورکړی او یو تن لادرکه دی. چارواکو زیاته کړې، چې په دې ولسوالۍ کې سیلابونو د خلکو کرنیزو ځمکو ته هم زیانونه اړولي دي او دغه راز یو شمیر کورونه یې هم نړولي دي. د سیمې اوسېدونکو له حکومت څخه د بیړنیو مرستو غوښتنه کړې او ویلي یې دي، چې حکومت او نور بنسټونه دې ژر تر ژره له زیانمنو شویو کورنیو سره مرستې وکړي.