مالیې وزارت نن د یوې خبرپاڼې په خپرولو سره، له هېواده بهر د غنمو انتقال اوازې بللي او رد کړې یې دي. د دغه وزارت ویلي، په دې وروستیو کې ځیني ناسم خبرونه خپاره شوي، چې ګنې له هېواد څخه غنم په قاچاقي ډول بهر ته صادرېږي؛ مالیې وزارت دغه اوازې ناسمې بولي او په کلکو یې ردوي. مالیې وزارت، د هېواد د ګمرکونو له لارې بهر ته په قاچاقي او غیرقانوني ډول د غنمو صادرول، ممنوع بللې او دغه چاره یې جرم ګڼلی دی. په خبر پاڼه کې راغلي، د مالیې وزارت له لارښوونې سره سم، په ټولو ګمرکونو کې د قاچاقي توکو د مخنیوي کلک تدابیر نیول شوي او هیچا ته اجازه نه ورکول کېږي چې په قاچاقي او غیر قانوني ډول غنم له هېواده بهر صادر کړي. یاد وزارت ټینګار کړی، چې د مالیې وزارت د ګمرکونو او بندرونو ویښ او زړور منسوبین شپه او ورځ د هېواد په ټولو ګمرکونو کې په دقیق ډول د ټولو ممنوعه توکو پر صادراتو او وارداتو کلکه څارنه لري او هيچا ته اجازه نه ورکوي، چې په غیرقانوني ډول ممنوعه توکي وارد او یا له هېواد څخه خارج کړي.
