د ایران په جنوبي ښار باقر شهر کې چاودنې څلور کسانو ته مرګ ژوبله اړولې ده. د یاد ښار پولیسو ویلي چې یاده چاودنه نن سهار رامنځته شوې او له امله یې دوه تنه وژل شوي او دوه نور سخت ټپیان دي. د پولیسو په خبره چاودنه د اکسیجن په یوې کارخونه کې د کارکوونکو د بې احتیاطۍ له امله شوې ده. په ورته وخت کې د باقر شهر ښاروال ویلي چې د اکسیجن د یوې سترې ډبې چاودنې له امله د کارخونې دیوالونه ویجاړ شوي او ورڅېرمه کورونو او دفترونو ته یې هم مالي زیانونه اړولي دي.
