پوهنې وزارت وایي، د هیوادوالو د ژوند، حقونو او ګټو هر اړخ په پام کې نیسي. د یاد وزارت له لوري خپرې شوې خبرپاڼه کې راغلي، اوس چې نړۍ او افغانستان کې کرونا وبا خپره ده، د انسان ژوند او بقا ساتل تر هر څه مهم دي نو له همدې امله د دولت کابینې پریکړه کړې ده چې ښوونځي تر یو ټاکلي وخت په حضوري توګه بند خو غیر حضوري زده کړې به دوام کوي. پوهنې وزارت زیاته کړې، دوی د کرونا وبا پر مهال د زده کړو دوام لپاره درې اړخیزه ستراتېژي جوړه کړې ده چې ځاني زده کړې، غیر حضوري زده کړې او په کوچنیو ټولګیو کې تجمعاتي زده کړې پکې شاملې دي. د یاد وزارت په خبره، دوی به د یادو ستراتيژیو په اړه لومړی د عامې روغتیا وزارت مسلکي مشورې اخلي او وروسته به له ولسمشرۍ ماڼۍ په دې اړه د هدایت غوښتنه کوي.
