رباني عبدالله او نور ته: د نورو په واک کې ګډون غیر معقول هدف دی

جمعیت ګوند کې تر خپلمنځي ستونزو وروسته، صلاح الدین رباني چې ځان د یاد ګوند سرپرست بولي وایي، د نورو په واک کې شراکت غیر معقول هدف دی. نوموړي د یاد ګوند څو غړو، عبدالله عبدالله، عطا محمد نور او یونس قانوني ته په اشارې ویلي، چې واک ته رسېدل د جمعیت ګوند اساسي هدف دی خو د څو وزارتونو او سفارتونو په بدل کې د نورو په واک کې ځان شریکول غیر معقول هدف دی. نوموړي چې اشاره یې عبدالله ته وه وویل، جمعیت د هغه په رهبرۍ د سولې پروسې مخالف نه دی خو په وینا یې ځینې کړۍ له دې پروسې سره سیاسي چلن کوي. نوموړي دغه راز د جمعیت ګوند د عمومي مجمع ترسره کېدو لپاره د یوې کمېټې د جوړېدو خبر هم ورکړی دی.