کاکړ: د خپلې خاورې د دفاع لپاره هر چېرته چې اړتیا وي اقدام کوو

د پاکستان لنډمهالی لومړی وزیر انوارالحق کاکړ وايي چې پاکستان د خپلو خلکو د دفاع لپاره په هر ځای کې چې اړتیا وي اقدام کولی شي. کاکړ په دې هکله د امریکا غږ له اردو څانګې سره په مرکه کې وایي، چې پاکستان به د خپلو خلکو د دفاع لپاره هر چېرته چې اړتیا وي، اقدام وکړي. کاکړ دا خبره د دې پوښتنې په ځواب کې چې ایا پاکستان به د ټي ټي پي پر وړاندې د افغانستان په خاوره کې هم اقدام وکړي، کړې ده. نوموړي د نورو هېوادونو پر وړاندې د افغانستان د خاورې د نه‌کارول کېدو په تړاو د دوحې په هوکړه کې د افغانستان د سرپرست حکومت ژمنو ته په اشارې سره وایي، چې د سرپرست حکومت چارواکي د سیمې له هېوادونو او ګاونډیانو سره د اړیکو د ښه کېدو لپاره پر دې ټکي قناعت لري. د پاکستان لنډمهالی لومړی وزیر زیاتوي، چې له ا.ا سره یې په خبرو کې د پاکستان ګټې په لومړیتوب کې دي. بل خوا د افغانستان سرپرست حکومت له پاکستانه غواړي، چې د اوسنیو ستونزو د حل لپاره له ا.ا سره د خبرو لار غوره کړي.