خوست کې د څه باندې سل زره ډالرو په ارزښت یو کانال جوړیږي

د خوست د شمل حرم سندیزې حوزې ریاست مسوولین وايي چې د یاد ولایت د صبریو یعقوبیو ولسوالۍ په سوري پاڼ سیمه کې د ۱۲۵۰ مترو په اوږدوالي د یوه کانال د بنسټ ډبره کېښودل شوه. د مسوولینو په وینا دغه پروژه د سویس هېواد د بهرنیو مرستو د پراختیايي ادارې په مالي ملاتړ د ۱۱۹ زره امریکايي ډالرو په لګښت جوړېږي، چې چارې به یې د شپږو میاشتو په بهیر کې بشپړې شي. ياده پروژه  د اوبو مدیریت او کرنیزو ځمکو د خړوبولو په موخه ترسره کېږي، چې د دې پروژې په پلې کولو  سره به زیاتې کرنیزې ځمکې خړوبې او د یادې سیمې خلک به له یاد کانال څخه په مستیقمه توګه ګټه واخلي. په دغه پروژه کې د سیمې سلګونو اوسېدونکو ته د کارزمینه برابره شوه.