پاکستان یو ځل بیا پر تازه میوو بار موټرو ته له کرښې د اوښتو اجازه نه ورکوي

د تازه مېوو يو شمېر سوداګر وايي، تورخم دروازه کې يو ځل بيا پر تازه مېوو بار افغان لاريو ته اجازه نه ورکول کېږي چې له کرښې واوړي. دوی وايي، له تېرو درې ورځو راهيسې يې موټرې پر انګورو بار ولاړې دي، خو د پاکستان حکومت په دې بهانه چې دا انګور د افغانستان نه، بلکې د تاجکستان دي، د اوښتو اجازه نه ورکوي. بل پلو د افغانستان او پاکستان د ګډې سوداګرۍ خونې يو مسوول خان جان الکوزي هم تاييد کړې، چې دوی خپلو سوداګرو ته تصديقونه هم ورکړي، خو بيا هم پاکستاني لوری اجازه نه ورکوي. د سپټمبر په نهمه وروسته له هغه چې د افغان او پاکستاني پوله ساتو ترمنځ نښته وشوه، دا درېيم ځل دی چې د پاکستان حکومت د تازه مېوو او سبزيو موټرو په مخه د تورخم دروازه تړي.