په بریتانیا او ویانا کې د افغانستان سفارتونو ویلي، چې دغه سفارتونه به خپلو کونسلګري خدماتو ته دوام ورکوي. د اتریش په ویانا ښار کې د افغانستان سفارت نن پر خپله ټویټر پاڼه لیکلي، چې د اتریش، هنګري، کرویشیا، سلووینیا او لیخټناشټاین مراجعه کوونکو ته کونسلګري خدمات وړاندې کوي. دغه سفارت ویلي چې دوی له نن څخه تر پنجشنبې پورې مراجعه کوونکو ته «لازمي» قونسلګري خدمات وړاندې کوي. په لندن کې د افغانستان سفارت هم اعلان کړی چې د پخوا په څېر به خپلو مراجعه کوونکو ته کونسلګري خدمات وړاندې کوي. د یادونې وړ ده، چې پرون د افغانستان د سرپرست حکومت د بهرنیو چارو وزارت اعلان کړی و، چې له دې وروسته د بریتانیا په لندن او د اتریش په ویانا کې د افغان سفارتونو خدمات د اعتبار وړ نه دي.
