ترکیه کې افغان سفارت: وان اوبو کې د ډوب شویو ۲۴ افغانانو مړي رایستل شوي

په ترکیه کې د افغانستان سفارت وایي چې د دغه هېواد په ختیځ وان سیند کې د ډوب شویو کډوالو له ډلې ۲۴ یې افغانان دي چې نن له اوبو رایستل شوي دي. ترکیه کې د افغان سفارت شارژدافیر حبیب احمد خنجاني ویلي چې د قربانیانو په ډله کې ماشومان هم شامل دي. راپورونه وایي چې تر اوسه د ډوبې شوې کښتۍ د سپرو له ډلې د ۵۸ کسانو مړي له اوبو را ایستل شوي دي. تر اوسه روښانه نه ده چې په یاده کښتۍ کې څو تنه سپاره وو. ترکي چارواکي وایي چې سیمې ته یې مرستندویان لېږلي او د ژغورنې عملیات دوام لري.