د حکومت پر پروګرامونو د نیوکو پر دوام، تازه ولسي جرګې د ملي دسترخوان پر پروګرام نیوکه کړې او دغه پروګرام یې د فساد لپاره لار جوړول بللی دی.
د ولسي جرګې غړو د تېرې ورځې په غونډه کې وویل چې حکومت دې په دغه ډول له فساده ډکو کړنو د ولس پر برخلیک لوبې نه کوي او له ملت سره دې له دغه ډول ظلمونو لاس واخلي. ولسمشر غني څو ورځې وړاندې د ملي دسترخوان پروګرام پرانیست چې ویل یې په دې پروګرام کې به میلیونونو خلکو ته خوراکي توکي وویشي.
د روانې میاشتې په ۲۸مه افغان ولسمشر د یو لړ مراسمو په ترڅ کې د ملي دسترخوان پروګرام پرانیست. دغه پروګرام دوه پړاوونه لري چې په هغه کې به د هېواد نوي سلنه وګړو ته د حکومت په خبره، لومړني خوراکي توکي ووېشل شي. حکومت وایي چې د پروګرام په لومړي پړاو کې ۳۴ ولایتونه، ۱۲۳ ولسوالۍ، ۱۲۸۹۶ کلي چې په مجموع کې ۱.۶۷ میلیونه کورنۍ کېږي، شامل دي. د لومړي پړاو مجموعي لګښت ۸۶ میلیون ډالر کېږي چې اوړه، وریجې، غوړي، لوبیا، صابون او یو شمېر نور لومړني خوراکي او غیر خوراکي توکي پکې شامل دي. همدا راز دویم پړاو هم په ۳۴ ولایتونو کې تطبیقېږي چې ۲۳۵ ولسوالۍ، ۲۱۸۴۲ کلي او ۲.۵ میلیون کورنۍ به په کې شاملې وي او د دویم پړاو مجموعي لګښت ۱۵۸ میلیون ډالره دی.
اوس د ټولنیزو رسنیو د کاروونکو ترڅنګ د ولسي جرګې غړو هم د افغان حکومت له دغه پروګرام سره مخالفت څرګند کړی دی. د ولسي جرګې غړي وایي چې ملي دسترخوان پروګرام په لوی لاس فساد ته زمینه برابرول دي او حکومت ته په کار ده چې له ورته غیر شفافو اقداماتو او پروګرامونو لاس واخلي. د ولسي جرګې د غړو په خبره، حکومت په خپلسرې توګه د ملي شورا له مشورې پرته دغه ډول میلیونونه ډالر په غیر شفافو پروګرامونو لګوي چې د جدي اندېښنې وړ مسئله ده. د ولسي جرګې د مالي او بودیجې د کمېسیون مشر میر افغان ساپی وايي، حکومت باید دغه پروګرام ودروي. د ده په خبره: ((د افغانستان د ولسي جرګې ماليي او بودجې کمېسیون له دې پروګرام سره خپل مخالفت څرګندوي او ټول ملت ته په ډاکه کوي وايي، چې دا د افغان مظلوم ملت سره ستر جفا ده)).
د دغه کمېسیون مشر میر افغان ساپي همدا راز د افغانستان د مالیې له وزارت غوښتي چې له دغه پروګرام سره مالي همکاري و نه کړي. د ده په خبره، ولسي جرګه د اوړي رخصتۍ پيلوي او که حکومت د ملي شورا له مشورې پرته دغه پروګرام پلی کوي او پیلوي، د ملت په حق کې جفا ده، فساد به وشي او راتلونکی مسوولیت به یې هم د افغان حکومت پر غاړه وي. د ده په خبره: ((د افغانستان له مالیې وزارت په جدي ډول غوښتنه کوو چې له هر ډول جوړجاړي لاس واخلي او که هر اقدام کوي باید ولسي جرګه چې قانوني بنسټ دی، په جریان کې پرېږدي)).
د ولسي جرګې بل غړی علي اکبر جمشېدي بیا وایي چې حکومت په لوی لاس د فساد لپاره زمینې برابروي او دغه ډول غیر شفاف پروګرامونه په حقیقت کې فساد ته لارې جوړول دي. د ده په خبره: ((ادارې فساد په حکومتي ادارو کې ډېرې ژورې ريښې کړې. کله چې د یوه پروګرام طرحه جوړېږي مخکې له دې چې هغه پروګرام پیل شي د فساد لپاره یې مخکې له مخکې طرحه جوړه شوې وي او عملي کېږي)).
افغان حکومت بیا وایي چې دوی دغه پروګرام پلی کوي او د افغانستان ولسي جرګه او مشرانو جرګه باید همکاري ورسره وکړي. د افغان حکومت د رسنیو د مرکز رییس لطیف محمود ویلي، دا په افغانستان کې د فقر د له منځه وړلو لپاره د افغان حکومت یو ملي پروګرام دی چې د ملي شورا غړي هم باید له دوی سره همکاري وکړي، څو پروګرام په سمه توګه عملي شي او د فساد مخه و نیول شي.
افغان حکومت داسې مهال د ملي دسترخوان پروګرام پیلوي چې تر دې وړاندې یې د وچې ډوډۍ پروګرام پیل کړی و او د دغه پروګرام په تړاو د فساد ګڼ شکایتونه موجود دي چې حکومت یې د څارنې او پلټنې په اړه څه نه دي ویلي.