افغان حکومت وایي له طالبانو سره سوله غواړي خو د طالبانو په جامه کې د بهرنۍ لوبې او دسیسې پلي کېدو ته اجازه نه ورکوي. د ملي امنیت شورا سلاکار حمد الله محب د ننګرهار د امنیتي وضعیت ارزونې لپاره دغه ولایت ته تللی و. نوموړي له ځایي چارواکو سره د لیدنې پر مهال ویلي چې په دغه ولایت کې د اصلاحاتو لړۍ باید په بې طرفانه توګه مخ ته لاړه شي او د ننګرهار د امنیت لپاره دې اړین اقدامات ترسره شي. نوموړي د سولې په اړه ویلي له طالبانو سره د سولې غوښتونکي دي، خو اجازه نه ورکوي چې د طالبانو په جامه کې پردۍ دسیسې او لوبې دلته پيل شي او بهرني جنګیالي په افغانستان کې خپلو ورانکاره فعالیتونو ته ادامه ورکړي. دده په خبره افغان حکومت په دې ښه پوه دی چې دسیسې چېرته جوړېږي او د روان ناورین اصلي جرړه چېرته ده، نو له همدې امله په پوره احتیاط له مسایلو سره برخورد کوي.
