په ظاهره د افغان حکومت له خوا د طالبانو د شپږ سوه بندیانو نه خوشې کول د بین الافغاني خبرو د پیل او سولې مخه نیولې ده. حکومت وايي چې دا بندیان جنايي دوسیې لري، خو طالبان یې ردوي او وايي چې حکومت د سولې د خبرو پر وړاندې خنډونه جوړوي. حکومت بیا ادعا کوي چې طالبانو د سولې خبرو د پیل لپاره خپلې ژمنې نه دي عملي کړې او د دوی له لوري د تاوتریخوالي دوام هېڅ لوري ته د منلو نه دی. له دې سره د ولسمشر د ملي امنیت سلاکار حمدالله محب ویلي، دوی له طالبانو سره د سولې غوښتونکي دي، خو اجازه نه ورکوي چې د طالبانو په جامه کې پردۍ دسیسې او لوبې دلته پيل شي او بهرني جنګیالي په افغانستان کې خپلو ورانکاره فعالیتونو ته ادامه ورکړي.
خلک چې څه محسوسوي هغه دا دي چې دغه دریځونه د سولې د خبرو د پیل مخه نیولې ده او دا چاره بیا د جګړې د غځیدو او د افغان وژنې د دوام سبب شوې ده. له همدې امله حکومت ورته پړ دی او د سولې په لاره کې یې یا خنډ ګڼي او یا هم شک پرې کوي چې سوله نه غواړي. د حکومت ځینې کړنې هم د دې سبب شوې چې شک پرې زیات شي او آن ځینې ډاډه کړي چې په ارګ کې واکمن د خپلې واکمنۍ د دوام لپاره د سولې مخالفت کوي. حکومت په پيل کې د یو طالب خوشې کولو تیار نه و، خو اوس یې تر څلورو زرو ډېر بندیان خوشې کړي دي. د حکومت دریځ بدل شو، طالبان خوشې شول، خو ورسره جګړه زیاته شوه او زرګونونو افغان کورونو ته یې د اولادونو جنازې ورغلې.
د افغانستان د حکومت دریځ له سولې سره د مخالفت تصویر ورکوي، که حکومت د سولې مخالفت کوي، نو بیا کیسه ښکاره ده او هر څه روښانه دي، خو که حکومت سم وي، نو دریځ یې وضاحت ته اړتیا لري. که داسې څه وي چې خلک یې نه ویني او حکومت یې ویني، پکار ده چې روښانه شي. حکومت ته پکار ده چې واضح کړي دوی آخر څه غواړي؟ ولې یې په پیل کې زندانیان نه خوشې کول؟ ولې یې بیا خوشې کړل؟ ولې یې اوس نه خوشې کوي؟ چارواکي خلکو ته ډاډ ورکولی شي چې دا شپږ سوه بندیان به هم نه خوشې کوي؟ اوس چې حمدالله محب وايي چې پردۍ دسیسې دي، ولې دا دسیسې نه روښانه کېږي؟ ولې خلک پر دې هر څه نه خبریږي؟
دا او دې ته ورته نورې مهمې جدي پوښتنې شته چې حکومتي چارواکي یې باید ځواب کړي. که دوی دغو پوښتنو ته منطقي او سم ځوابونه ونه لري، نو بیا د حکومت په اړه د ډېری خلکو قضاوت سم دی. داسې ښکاري چې حکومت دغو پوښتنو ته ځواب نه لري. دا هم سمه ده چې په طالبانو کې ستونزې شته، خو اوس خلک حکومتي چارواکي د سولې خنډ ګڼي. خلک به بیا هم حکومت ته د وضاحت وخت ورکړي، خو که حکومت له وضاحت پرته همداسې دریځ ولري، خلک به مجبور شي چې د سولې لپاره ودریږي او خنډونه به له مخې لرې کړي. هغوی چې د خپل واک د دوام لپاره د افغان وژنې دوام غواړي، د خلکو له غبرګون سره به مخ کېږي او دوی به بریالي نه شي چې زموږ په وینو د خپل واک ماشین وچلوي.
