تورخم کې له پاکستانه د را شړل شوو افغان کډوالو لپاره په جوړ شوي پنډغالي کې د ۲۰۱ قول اردو اړوند روغتون په تېرو شپږو ورځو کې ۱۱۳۵۷ ناروغان کتلي او درملنه يې کړې ده. د ياد نظامي روغتون مسوولين وايي، چې په دغو ناروغانو کې نارينه، ښځې او ماشومان شامل دي. مسوولين زياتوي، په دې روغتون کې هره ورځ د ارتوپيدي، جراحۍ، غاښونو او نور اړوند ناروغان ګوري او درملنه يې کوي. دوی وايي، په دغه روغتون کې هره ورځ په اوسط ډول له ۱۷۰۰ څخه تر ۱۸۰۰ پورې ناروغان کتل کيږي. بلخوا بيا راغلي کډوال هم له يادو روغتيايي خدمتونو څخه خوښ دي.
