پنجشېر کې د برېښنا ۸ برجونه جوړ شول

د پنجشېر ولایتي چارواکي، په تېرو شپږو میاشتو کې د دغه ولایت په بېلابېلو برخو کې د برېښنا د اتو برجونو له جوړېدو خبر ورکوي. دوی وایي چې د دغو برجونو په جوړېدو سره به څه باندې ۸۰۰ زره کورنۍ له برېښنا برخمنې شي. ورته مهال، د پنجشېر اوسېدونکي له مسوولینو غواړي، چې برېښنا ته د لا ښه لاسرسي په موخه، پام زیات کړي.  د مسوولینو په خبره، د دغه ولایت د پارندې برېښنا بند، چې ۱۶ کاله وړاندې یې د ۵.۷ میلیونه ډالرو په لګښت چارې پیل شوې وې، ۹۷ سلنه بشپړې شوې او تمه ده پاتې چارې یې هم نږدې راتلونکي کې پیل شي.