راشد خان په را روان بیګ باش لیګ کې نشي لوبېدلی

د استرالیا د ستر سوداګریز لیګ بیګ باش مسوولینو خبر ورکړی دی، چې راشد خان د ملا ژوبلېدو له امله په سږني پړاو بیګ باش لیګ سیالیوکې نشي لوبېدلی. راشد خان چې په یاد لیګ کې له سټرایکرز لوبډلې سره د لوبېدو تړون لري، دغه لوبډلې هم د راشد خان په ټپي کېدو او له دوی سره په نه لوبېدو خواشیني څرګنده کړې او راشد خان ته یې د بېړنی روغتیا هیله څرګنده کړې ده. راشد خان هغه افغان کرکټ لوبغاړی دی، چې نن سبا د نړۍ په کچه یو  له تر ټولو غوره لوبغاړی ګڼل کیږي او د نړۍ داسې ستر سوداګریز لیګ نشته چې راشد خان دې پکې نه وي لوبېدلی. افغان کرکټ بورډ تر اوسه د راشد خان د روغتیا په اړه څه نه دي ویلي چې هغه څه ستونزه لري او ترکومې پورې به له لوبو کولو بهر پاتې شي.