ملي امنیت شورا: طالبان دې دایمي اوربند او بین الافغاني خبرې پيل کړي

افغان حکومت یو ځل بیا پر طالبانو غږ کړی چې له جګړو لاس واخلي، دایمي اوربند وکړي او د بین الافغاني خبرو پر مټ دایمي سولې ته لار هواره کړي. د ملي امنیت شورا د ملګرو ملتونو پر وروستي راپور غبرګون ښودلی دی. ملي امنیت شورا وایي د ملګرو ملتونو راپور ښيي چې ملکي وګړو ته تر ټولو ډېره مرګ ژوبله د وسله والو طالبانو په بریدونو کې اوښتې ده. د سرچینې په خبره که ملګري ملتونه وغواړي ددغه ډول راپورونو په چمتو کولو کې لا ډېره همکاري ورسره کولی شي، ځکه د ملکي وګړو مرګ ژوبله تر هغه لوړه ده چې په راپور کې راغلې. ملي امنیت شورا دغه راز وايي چې طالبان باید نور له جګړو لاس واخلي، دایمي اوربند وکړي، بین الافغاني خبرو ته دې تیار شي او په دې توګه دې دلته روانه اوږده جګړه پای ته ورسوي، څو ټولې خواوې د ملکي وګړو د خوندیتوب او هوساینې لپاره په ګده کار وکړي.