تېر کال له افغانستانه د ۱.۹ میلیارده ډالرو په ارزښت صادرات شوي

د صنعت او سوداګرۍ وزارت وایي، افغانستان په تېر ۲۰۲۳ کال کې د ۱.۹میلیارد ډالرو په ارزښت بهر ته صادرات کړي چې دوه سلنه لوړوالی ښيي. دغه وزارت ویلي، چې د سالنګ لویي لارې ترمیم، د ډبرو سکرو صادراتو کې کموالی راتلل او د ګاونډیو هېوادونو ستونزو سره سره بیا هم د صادراتو په برخه کې ۲سلنه زیاتوالی راغلی چې ۴۱میلیونه ډالره کیږي. سرچینې زیاته کړې، د زراعتي محصولاتو لکه پنبه، وچ انځر او مڼو په صادارتو کې زیاتوالی راغلی دی. په همدې وخت کې پاکستان، ازبکستان او تاجستان ته په صادراتو کې کموالی راغلی، خو هند، چین او قزاقستان ته بیا زیات شوي دي. یاد وزارت ویلي، د افغانستان صادراتو راتلونکي په اړه یې پلانونه او پروګرامونه، لکه د صادراتو د پروسس زونونو جوړول، صادراتي ډیټابیس، د صادراتي اسنادو د طی مراحل واحد مرکز، د صادراتو پیاوړتیا پروژو بیا رغونه او د بشري قوې ډېرول هغه څه دي چې د هېواد د صادراتو په ډېروالی یې اغېز کړی دی.