روان کال د ۲ میلیونه ډالرو په ارزښت د قیمتي ډبرو صادرات شوي

د افغانستان د صنایعو او سوداګرۍ وزارت چارواکو خبر ورکړی، چې  په تېرو ۸ میاشتو کې د ۲ میلیونه ډالرو په ارزښت د قیمتي ډبرو صادرات ترسره شوي دي. د یاد وزارت د چارواکو په خبره دوی هڅه کوي چې د قیمتي او نیمه قیمتي ډبرو د صادراتو په برخه کې لا زیاتې اسانتیاوې برابرې کړي. د دغه وزارت ویاند له رسنیو سره په خبرو کې ویلي، چې په تېرو اتو میاشتو کې د ۲ میلیونه ډالرو په ارزښت قیمتي او نیمه قیمتي ډبرې بهرنیو هېوادونو په ځانګړې توګه پاکستان ته صادر شوې دي. قیمتي او نیمه قیمتي ډبرې د افغانستان یو له مهمو طبیعي زیرمو څخه دي چې اوسمهال بهرنیو هیوادونو ته صادریږي. په ورته وخت کې د کانونو او پټرولیم وزارت ویلي، چې سرپرست حکومت هڅه کوي چې قیمتي او نیمه قیمتي ډبرې په ځانګړي ډول زمرد په شفاف ډول استخراج کړي.