خلیلزاد: د امریکايي پوځيانو د وژلو په اړه ایران باید درنه بیه پرې کړي

په ملګرو ملتونو او افغانستان کې د امریکا پخواني سفیر زلمي خلیلزاد د ایران پلوه وسله والو په برید کې د درېیو امریکايي پوځیانو د وژل کېدو په غبرګون کې ویلي، د ایران پر وړاندې د بایډن د مخنیوي پالیسي ناکامه شوې او اوس باید ایران د دغه برید درنه بیه پرې کړي. خلیلزاد چې د جمهوري غوښتونکو ګوند له نږدې سیاستوالو څخه دی، د دغه ګوند له لوړپوړو سیاستوالو سره په لیدنه کې د ایران پر ګټو د مستقیم برید غوښتنه وکړه. هغه ویلي چې ایران پرته له دې چې «له باور وتلې بیه پرې کړي» د مهارولو نه دی او په سیمه کې د دوی ملاتړي ځواکونه به پر امریکايي پوځیانو او پوځي تاسیساتو بریدونه وکړي. د امریکايي چارواکو په وینا په دغه برید کې ۲۵ کسان ټپیان شوي هم دي. د امریکا ولسمشر جو بایډن ویلي دا برید د ایران له ملاتړه برخمنو سختدریځو وسله والو کړی چې په سوریه او عراق کې فعال دي. بایډن ویلي،  پر هغو ټولو کسانو چې د دغه برید مسوول دي، پر خپل وخت عدالت په داسې بڼه پلی کړي، چې دوی یې غواړي. ایران تر دې دمه په دې اړه څه نه دي ویلي.