ایران او پاکستان د ګډو ننګونو د حل لپاره په ګډې تګلارې ټینګار وکړ

د ایران او پاکستان له لوري د یو بل پر خاوره له وروستیو بریدونو وروسته د دواړو هېوادونو د بهرنیو چارو وزیرانو په اسلام‌اباد کې سره لیدلي او د دوه اړخیزو همکاریو پر پیاوړتیا یې خبرې‌اترې کړې دي. د پاکستان د بهرنیو چارو وزارت د بیان له مخې په دې لیدنه کې د تهران او اسلام‌اباد د دوه اړخیزو اړیکو د پراختیا د یوې لارې په توګه د خبرو اترو او پیاوړې همکارۍ پر ارزښت ټینګار کړی دی. په ورته وخت کې، دواړو ګاونډیانو هوکړه کړې چې د متقابل درناوي او ګډې تګلارې په چوکاټ کې د دوه‌اړخیزو موخو د پرمختګ او له ګډو ننګونو سره د مبارزې لپاره کار وکړي. د امیر عبداللهیان په مشرۍ د ایران یو لوړپوړی دیپلوماتیک او پوځي پلاوی پرون پاکستان ته سفر وکړ.