هرات کې زلزله ځپلو ته ۶۹ نور کورونه هم وسپارل شول

د هرات ولايت د زنده جان ولسوالۍ د سربلند او نايب رفيع کليو کې زلزله ځپلو ته ٦٩ کورونه وسپارل شول. د هرات د اطلاعاتو او فرهنګ رييس ویلي، چې دغه کورونه د قمر خيريه بنسټ له خوا جوړ شوي دي. د هرات ولايت د اطلاعاتو او فرهنګ رييس او د زلزله ځپلو د کميسيون وياند احمدالله متقي ویلي، چې د دغو کورونو پر جوړولو ٤٨ میليونو افغانۍ لګښت راغلی دی. تر دې مخې هم د سلواغې په ۱۶مه نېټه د زنده جان ولسوالۍ په ۱۳ کلیو کې زلزله ځپلو ته د ۳۷۸ کورونو د ورکړې خبر ورکړل شوی و. د هرات ولایتي چارواکي وايي، په راتلونکو لسو ورځو کې به زلزله ځپلو ته ۱۵۷ نور کورونه هم وویشل شي.