چارواکي: کابل کې د اوبو کمښت ستونزې د حل لپاره هڅې پيل شوي

د سرپرست حکومت سیاسي مرستیال د کابل ښار د دوه وېشتو ناحیو د یو شمېر مخورو، دیني عالمانو، د ګذر وکیلانو، د اهل تشیع او اهل هنودو له استازو سره کتلي دي. په دې ناسته کې د کابل ښار د ناحیو استازو په کابل ښار کې د څښاک اوبو کموالی جدي ستونزه وبلله او د کابل ښار پراختیا، د پاکو اوبو برابرولو او د کابل ښاریانو او سرپرست حکومت ترمنځ د همکاريو او ګډو فعالیتونو په زیاتولو ټینګار وکړ. سیاسي مرستیال وویل، چې په کابل ښار کې د څښاک اوبو کمښت جدي او د اندېښنې وړ موضوع ده، چې د سرپرست حکومت له لوري یې د حل لپاره هڅې پيل شوي او کابل ته د پاکو اوبو د را لېږد لپاره به کار وشي چې په دې برخه کې له نورو هېوادونو سره د مرستې په اړه بحثونه شوي دي.