کابل ښاروالۍ په خپله اېکس پاڼه، د دولسمې ناحیې په ۱۲م ګذر د احمدشاه بابا مېنې پروژې په سیمه کې د ۲ فرعي سړکونو د جوړولو خبر ورکړی دی. د کابل ښاروالۍ د مالوماتو له مخې، دا فرعي سړکونه په ټولیزه توګه ۷۵۰ متره اوږدوالی او ۵ متره سور لري، چې د لښتیو په ګډون د ۸ میلیونه افغانیو په لګښت د دوه نیمو میاشتو په موده کې جوړ شوي دي. د یادولو وړ ده، چې دا پروژه د کابل ښاروالۍ له لوري د ملګرو ملتونو د پروژوي خدمتونو ادارې په مرسته د محرومو سیمو اوسېدونکو ته د آسانتیاوو او کاري بوختیاوو رامنځته کولو په موخه طرحه شوې او تر دې وړاندې د نهمې ناحیې په ۶ او ۱۶م ګذر کې هم ۷ فرعي سړکونه جوړ او ګټې اخیستنې ته سپارل شوي دي.
