د افغانستان او ایرلنډ ترمنځ د درې یو ورځنیو لوبو د لړۍ لومړۍ لوبه پرون د متحده عربي اماراتو په شارجه کې، د ۳۵ منډو په توپیر افغانستان وګټله. افغانستان د پچې له بایللو وروسته لومړۍ توپ وهنه وکړه او د پنځو لوبغاړو په سوځېدو سره یې مقابل لوري ته د ۳۱۱ منډو هدف وټاکه. ایرلنډ په ځواب کې په ټاکل شویو ۵۰ اورونو کې د اتو لوبغاړو په سوځېدو یوازې ۲۷۵ منډې وکړې او لوبه د افغانستان په ګټه پای ته ورسېده. د افغانستان د پرانیستونکي توپ وهونکي رحمان الله ګربز ۱۲۱ منډو د افغان لوبډلې بریا یقیني کړه او ګربز د دغې لوبې ترټولو غوره لوبغاړی ونومول شو. د افغانستان تیز توپ اچوونکي فضل حق فاروقي د مقابل لوري څلور لوبغاړي وسوځول او د افغانستان په بریا کې یې مهم رول ولوباوه. د افغانستان او ایرلنډ ترمنځ د روانې لړۍ دویمه لوبه سبا کېږي.
