د سمنګان – بغلان پر لاره د یوې ترافیکي پېښې له امله یو تن مړ شوی او ۷ نور ټپیان دي. د سمنګانو د ترافیکو مدیر قاري محمد نذیر سعد وايي، چې دغه پېښه پرون ماسپښین د سمنګان – بغلان پر لاره رباتک سیمې ته نږدې د دو هزار او هایلکس موټر د ټکر له امله رامنځته شوې چې په کې یو تن مړ شوی او ۷ نور ټپیان شوي دي. سعد د دغه پېښې لامل د موټر چلوونکو بې احتیاطي بولي. ورته مهال د سمنګانو روغتیايي مسوولین وايي، چې د ټپیانو له ډلې د ۴ تنو روغتیايي وضعیت د اندېښنې وړ دی چې له منځه یې یو تن د بلخ حوزوي روغتون ته لېږدول شوی دی.
