سهیل شاهین: له ګاونډیو هېوادونو سره زموږ اړیکې سیاسي دي، نه نظامي

طالبانو له ایران سره اړیکې تایید کړې دي خو له روسیې څخه یې د وسلو تر لاسه کولو ادعا په کلکه رد کړې ده. په قطر کې د طالبانو د سیاسي دفتر ویاند سهیل شاهین له ریانواستي خبري شبکې سره په تازه مرکه کې ویلي چې دوی له ګاونډیو هېوادونو سره اړیکې لري خو په وینا یې دا اړیکې سیاسي دي نه نظامي. هغه د خپلو خبرو پر دوام زیاته کړې، ایران د افغان کشالې سوله ییز حل غواړي او دا چې په دې وروستیو کې یې د سولې خبرو کوربتوب ته چمتوالی ښودلی دی، دوی یې هرکلی کوي. هغه ویلي په دې وروستیو کې داسې ادعاوې شوې دي چې طالبانو له روسې نظامي مرستې تر لاسه کړې دي خو طالبان دا ادعاوې په کلکه ردوي او ټینګار کوي چې دوی له ګاونډیو هېوادونو سره یوازې سیاسي اړیکې لري او په راتلونکې کې هم ورته دوام ورکوي. نوموړی دا څرګندونې وروسته تر هغه کوي چې امریکا او یو شمېر افغان چارواکي روسیه او ایران د طالبانو په مالي ملاتړ تورونوي خو دا ادعاوې طالبانو، روسیې او ایران په وار وار رد کړې دي.