د بغلان له صنعت کارانو سره د مچیو د خوراکي توکو مرسته شوې

د  بغلان د کرنې، اوبولګولو او مالدارۍ ریاست مسوولین وايي، چې په دغه ولایت کې د یوسایډي او (ډي. اې. آی) ادارو له  لوري د شاتو د تولید له ۱۵۰  صنعت کارانو سره د مچیو د خوراکي توکو مرستې شوې دي. د یاد ولایت د کرنې، اوبولګولو او مالدارۍ ریاست مطبوعاتي مسوول ولي آمرخېل ویلي، چې د مرکز پلخمري په ګډون په خوست، نهرین، برکې، مرکزي بغلان، پلخمري، ده صلاح او پلحصار ولسوالیو کې د یوسایډي او (ډي. اې. آی) ادارو له لوري« د افغانستان لپاره د کرنې ځنځیري ارزښت » پروژې په چوکاټ کې د شاتو د تولید پر ۱۵۰ صنعت کارانو د مچیو خوراکي توکي وېشل شوې دي. ورته مهال د بغلان اوسېدونکي وايي، چې په وروستیو کلونو کې په هېواد کې د مچیو روزل دود شوي او اوس مهال په شنو غونډیو او دښتو کې د مچیو صندوقونه ډېر لیدل کېږي.