له پاکستانه د افغان کډوالو د ایستلو د دویم پړاو د پیلېدو په اړه اندېښنې مخ په زیاتېدو دي. د پاکستان په کراچۍ ښار کې د افغان کډوالو مدافع وکیلې منیژه کاکړ وايي، په هغو سیمو کې چې د افغانستان د تابعیت کارت لرونکي افغانان اوسي په وروستیو کې د پولیسو ورتګ زیات شوی او هغوی ته ویل شوي چې د اپرېل له ۱۵مې مخکې له پاکستانه ووځي کنه په زوره به وایستل شي. اغلې کاکړ د ملګرو ملتونو د کډوالو له لویې کمېشنرۍ غوښتي چې د افغان کډوالو او پناه غوښتونکو د امنیت او حقونو د خوندیتوب لپاره ژر تر ژره اقدام وکړي. په عین حال کې په پاکستان کې د افغان کډوالو د شورا رییس میراحمد روفي له پاکستانه د افغان کډوالو د ایستلو د دویمې مرحلې په اړه د اسلام آباد پرېکړه دردونکې او یوه غمیزه بللې ده.
