کابل ته د مالیزیا د لومړي وزیر د استازې ډاکتر شاهزلینا په مشرۍ راغلي پلاوي د بهرنیو چارو له سرپرست وزیر سره په لیدنه کې ویلي، چې مالیزیا غواړي له سرپرست حکومت سره خپلې اړیکي لا پراخې کړي. د مالیزیا د لومړي وزیر استازې په دې لیدنه کې ویلي، چې مالیزیا غواړي په بېلا بېلو برخو کې د افغان دیپلوماتانو او ملکي کارکوونکو لپاره لنډ مهاله روزنیزو پروګرامونه جوړ کړي. نوموړې زیاته کړې، چې نږدې وخت کې به د مالیزیا یو سوادګریز پلاوی هم افغانستان ته سفر وکړي. ورته مهال د بهرنیو چارو سرپرست وزیر په دې لیدنه کې د افغانستان او مالیزیا اړیکې د پراختیا په حال کې بللي او د مالیزیا له حکومت څخه یې غوښتي، چې مالیزیا میشتو افغانانو لپاره دې د روغتیا او زده کړو اسانتیاوې برابرې کړي.
