د امریکا د سولې په انیستیتوت: د طالبانو او افغان حکومت مذاکرات به اوږده موده ونیسي

د امریکا د سولې په انیستیتوت کې د افغانستان د مسایلو څېړونکی جاني والش وایي ددې امکان شته چې طالب او افغان پلاوی ډېر د بحث وړ موارد د خبرو ميز ته راوړي چې اونۍ او ان میاشتې وخت ونیسي. نوموړي ویلي له همدې امله ددې امکان شته دی چې بین الافغاني خبرې ډېره موده ونیسي او افغانستان ژر سولې ته و نه رسېږي. ددې تر څنګ جاني والش وايي تر ټولو مهمه دا ده چې دواړه لوري د جګړې پر کمولو او یا بشپړ درولو خبرې وکړي او تر هغه وروسته دې پر نورو مسایلو بحثونه وشي. نوموړی همدا راز د طالبانو او افغان حکومت د پلاوي پر واکونو هم غږېدلی او وایي دوی ته دواړو لورو واکونه ورکړي دي خو بیا هم هېڅ پرېکړه په یوازې ځان نه شي کولی او له خپلو مشرانو سره به تر ډېره په مشورو بوخت وي.