امریکایي چارواکو ویلي، چې پرون د دغه هېواد په څلورو ایالتونو کې توپان او بړبوکۍ ۲۱ کسان مړه کړي دي. د راپورونو له مخې، دغه توپان په ارکانزاس، تګزاس، کنتاکي او اکلاهما ایالتونو کې سلګونه کورونه ویجاړ کړي دي. د راپورونو پر بنسټ، د دغه توپان او بړبوکۍ له امله اته تنه په ارکانزاس، اووه تنه په تګزاس، څلور په کنتاکي او دوه کسه هم په اکلاهما کې مړه شوي دي. د امریکا د هوا پېژندنې ادارې په نیوجرسي، نیویارک او پنسلوانیا ایالتونو کې د تالندې برېښنا خبرداری ورکړی و. په تګزاس کې چارواکي وایي، نږدې ۱۰۰ کسان د دغه ایالت په بړبوکیو کې ټپیان شوي دي. همدارنګه د خرابې هوا له امله د دوشنبې په ورځ سلګونه امریکایان له برېښنا بې برخې وو.
