سره له دې چې په هېواد کې د کرونا ویروس د پراختیا او نا امنیو وېره وه، خو افغانانو د هېواد په ۳۴ ولایتونو کې د خپلواکۍ ۱۰۱مه کلیزه په خورا شاندارو مراسمو ونمانځله. د راپورونو له مخې، په ځینو ولایتونو کې وړې امنیتي پېښې شوې دي، خو دومره تلفات یې نه لرل او افغان ولس په ډاډمنه فضا کې د خپلواکۍ د بېرته اخیستو کلیزه ونمانځله. د دې تر څنګ ولسمشر غني، پخواني ولسمشر حامد کرزي، د ملي مصالحې عالي شورا مشر ډاکتر عبدالله، ناټو او ان طالبانو هم د خپلواکۍ پر کلیزه بېلابېلې اعلامیې خپرې کړې وې. د ګڼو هېوادونو ولسمشرانو هم ولسمشر غني ته د دې ورځې مبارکي را استولې ده.
پرون سهار په ملي دفاع وزارت کې د استقلال منار ته د ګلونو په اېښودو ولسمشر غني د خپلواکۍ ۱۰۱ مه کلیزه ونمانځله. په دغو مراسمو کې د حکومت لوړپوړو چارواکو ګډون کړی و او ولسمشر غني د استقلال منار ته د ګلونو په اېښودو د دې ورځې نمانځنه پیل کړه. له دې ورځې پوره ۱۰۱ کاله مخکې مقتدر افغان پاچا غازي امان الله خان د افغانستان خپلواکي واخیسته او هېواد یې د انګریز له تسلط آزاد کړ. هغه مهال یې په خپلو مترقي افکارو غوښتل په هېواد کې د پرمختګ او لا پیاوړتیا لپاره کار وکړي، خو د انګریزي ښکېلاک د مل کسانو او استعماري فکر د دې اجازه ور نه کړه چې خپلو چارو ته ادامه ورکړي او حکومت یې سقوط وکړ.
په همدې مناسبت د هېواد په ۳۴ ولایتونو کې شانداره جشنونه جوړ شوي وو. افغان ولس له امنیتي ګواښونو او د کرونا ویروس له خطر سره سره د خپل هېواد خپلواکي ونمانځله او په ځينو ولایتونو کې د افغان ځواکونو نظامي نمایش هم ترسره شوی دی. په کابل کې هم له دې ورځې توده نمانځنه وشوه او موټریزو کاروانونو د افغانستان ملي بیرغونه لېږدول.
له دې ورهاخوا د نړۍ ګڼو هېوادونو افغان ولسمشر ته د پیغام له لارې افغانانو ته د دې ورځې مبارکي ورکړې ده. د چین ولسمشر شي جین پېنګ افغان ولسمشر ته په استولي پیغام کې ویلي چې چین او افغانستان په خپلو کې پوره ۶۵ کاله حسنه دیپلوماتیک روابط پاللي دي. د ده په خبره، ټول افغان ولس ته خپلواکۍ د بېرته اخیستلو په مناسبت مبارکي وایي او د دې غوښتونکی دی چې د دواړو هېوادونو ترمنځ اړیکې لا پراخې او غښتلې شي. ولسمشر شي همدا راز ویلي چې د افغانستان د سولې په پروسه کې به همکاري کوي او تمه لري چې دلته اوږده جګړه ژر پای ته ورسېږي.
د هند لومړي وزیر نرېندرا مودي هم ولسمشر غني ته د خپلواکۍ د ۱۰۱ مې کلیزې مبارکي ورکړې ده. د روسیې ولسمشر ویلادیمیر پوتین هم په یوه پیغام کې د دې ورځې مبارکي افغانانو ته ورکړې او تمه یې ښودلې چې ژر تر ژره په افغانستان کې روانه جګړه پای ته ورسېږي.
د ترکیې ولسمشر رجب طیب اردوغان هم په یوه پیغام کې ویلي چې د افغانستان ملت ته د خپلواکۍ مبارکي وايي او تمه لري چې ژر تر ژره په افغانستان کې روانه جګړه پای ته ورسېږي. د دې تر څنګ افغان چارواکو هم په دې اړه څرګندونې کړې دي. د ملي مصالحې عالي شورا مشر ډاکتر عبدالله عبدالله ویلي، تمه ده چې د افغانستان ۴۲ کلنه جګړه ژر تر ژره د خبرو له لارې پای ومومي او افغانان روښانه راتلونکې ولري. د ده په خبره، د خپلواکۍ اخیستل د نیکونو ویاړ دی او اوس به سوله د دې نسل ویاړ وي.
بلخوا طالبانو بیا ویلي چې امان الله خان یو استعمار ختم کړ او طالبان د امریکا ناکامولو ته نږدې شوي دي. دوی ټینګار کړی چې په جګړه کې بریالي دي او امریکا یې په شا کړې ده. بلخوا په کابل کې د ناټو ځواکونو عمومي قوماندان جنرال سکاټ مېلر هم د مبارکۍ تر څنګ ویلي، تمه لري چې ژر تر ژره بین الافغاني خبرې پيل شي او روانه جګړه پای ته ورسېږي.
بلخوا د خپلواکۍ د جشن د نمانځې پر مهال ځينې امنیتي پېښې هم شوې دي. له دې ډلې په کابل کې پر څو حوزو ۱۴ راکېټي بریدونه وشول چې لس ملکیان پکې ټپیان شول. د بریدونو مسوولیت هم چا نه دی منلی.