د هېواد د بهرنیو چارو وزارت وایي، د دې احتمال شته چې نړیواله ټولنه له افغانستان سره خپلې مرستې کمې کړي. حنیف اتمر چې پرون یې په ولسي جرګې کې د باور رایې اخیستو لپاره خپلې برنامې تشرېح کولې، وویل، چې افغانستان په حساسو شرایطو کې دی او د دې اړتیا ده چې مذاکرات یوې پایلې ته ورسېږي. نوموړی دغه راز وايي، که وضعیت همداسې دوام کوي او طالبان پر خپلو ژمنو عمل نه کوي، نو ښايي د افغان سولې په تړاو سیمه ییزه او نړیواله اجماع هم زیانمنه شي.
پرون په ولسي جرګه د افغانستان د کابینې درېیو غړو د خپلو راتلونکو پروګرامونو او پلانونو په اړه خبرې وکړې. د بهرنیو چارو لپاره نوماند وزیر په خپلو څرګندونو کې د افغانستان پر بهرني سیاست، سولې، نړیوالو مرستو او نړیوالې اجماع خبرې وکړې. نوموړي وویل، له افغانستان سره د نړیوالې ټولنې څلور کلنې مرستې په راتلونکو دوو میاشتو کې پای ته رسېږي چې له همدې امله د جینوا کنفرانس لپاره تیاری روان دی. هغه وايي، د دې احتمال شته چې له افغانستان سره د نړیوالې ټولنې مرستې کمې شي. حنیف اتمر وایي، ښايي نړیواله ټولنه نور په دې بریالۍ نه شي چې له افغانستان سره خپلو مالي مرستو او همکاریو ته ادامه ورکړي. د ده په خبره: ((د دې خطر شته چې نړیواله ټولنه نور له افغانستان سره د مرستو په برخه کې پاتې راشي، ښايي خپلو همکاریو ته ادامه ور نه کړي، خو د جینوا په کنفرانس کې موږ د دوی د مرستو د جلب لپاره هڅه کوو)).
حنیف اتمر وایي، نړیوالې ټولنې افغانستان ته د مرستو د دوام لپاره یو شرط ټاکلی او د کابینې په غونډه کې پر دې شرط خبرې روانې دي. نوموړي د دغه شرط په اړه نور وضاحت نه دی ورکړی، خو تر دې وړاندې ځینو مرستندویه هېوادونو ویلي وو چې له افغانستان سره د دوی مرستې له دې وروسته د سولې هوکړې پر عملي کېدو او په افغانستان کې پر روان وضعیت پورې تړلې دي. دوی ویلي وو چې که په افغانستان کې سوله راځي او جګړې کمېږي، نو دوی به د خپلو مرستو پر جریان بیا کتنه کوي.
حنیف اتمر دغه راز د سولې په اړه هم خبرې او څرګندونې لرلې. نوموړي وویل چې د سولې له راتګ سره سره، دې احتمال شته چې په افغانستان کې د ترهګرو ډلو فعالیتونو دوام وکړي. د ده په خبره، په افغانستان کې اوس د جنګېدونکو وسله والو له هرو پنځو یو یې بهرنی دی چې افغان حکومت له بهرنیو جنګیالیو سره سوله نه کوي، بلکې د ترهګر په توګه به یې پر وړاندې مبارزه کوي. اتمر وایي، دغه ډلې ښايي ترهګریزو فعالیتونو ته د سولې تر راتګ وروسته هم ادامه ورکړي.
د بهرنیو چارو وزارت لپاره نوماند وزیر دغه راز زیاته کړې چې د افغانستان د سولې پروسه له نړیوال ملاتړ او د نړیوالې تولنې له همکارۍ پرته بریالۍ کېدای نه شي. هغه وایي، که وضعیت همداسې دوام کوي او جګړې شدیدې وي، نو د دې احتمال شته چې د افغان سولې په اړه رامنځ ته شوې اجماع زیانمنه شي. نوموړی وایي چې دوی له ټولو خواوو هڅه کوي، څو د افغان سولې په اړه اوسنۍ اجماع لا پیاوړې شي او د سیمې هېوادونه په صادقانه توګه په دې بهیر کې مرسته وکړي.
حنیف اتمر له نړیوالې ټولنې وغوښتل چې له افغانستان سره همکاري وکړي. د ده په خبره، ملګري ملتونه او د ملګرو ملتونو امنیت شورا باید د سولې لپاره او تر سولې وروسته له افغانستان سره په اقتصادي، سیاسي او مالي برخه کې همکاري وکړي، څو افغان حکومت وکړی شي د دې پروسې د بریا لپاره مهمې برنامې جوړې کړي او افغانستان ته دایمي ثبات راولي.
حنیف اتمر پر طالبانو نیوکه کړې چې تاوتریخوالی یې نه دی کم کړی، جګړې یې نه دي کمې کړې او پر ژمنو عمل نه کوي چې همدې مسئلې جګړه اوږده کړې ده. د طالبانو د قطر دفتر ویاند محمد نعیم بیا په تازه څرګندونو کې ویلي چې دوی سولې ته ژمن دي او هیله لري چې روان مذاکرات ژر تر ژره پایلې ته ورسېږي.
