استرالیا: طالبان دې سولې ته د رسېدو لپاره پر خپلو ژمنو عمل وکړي

د استرالیا د بهرنیو چارو وزیرې ماریس پېن له خپل افغان سیال حنیف اتمر سره په یوه تلیفوني مکالمه کې د افغانستان ?? پر وضعیت او دوه اړخیزو اړیکو خبرې کړې دي. موریس په خپلو خبرو کې په افغانستان کې اوسنی تاوتریخوالی د جدي اندېښنې وړ بللی دی او زیاته کړې یې ده چې د طالبانو له لوري، د ملکيانو، ښځو، ماشومانو او بې دفاع وګړو پر وړاندې تاوتریخوالی د منلو نه دی. هغې زیاته کړې چې طالبانو د سولې لپاره له نړیوالې ټولنې سره ژمنې کړې دي او باید پر ژمنو عمل وکړي. په دې مکالمه کې همدا راز د دوه اړخیزو اړیکو پر پراختیا او تر څنګ یې په کابل کې د استرالیا پر دایمي دیپلوماتیک حضور هم خبرې شوې دي. همدا راز په افغانستان کې د استرالیا د ځانګړو ځواکونو پر جنګي جنایتونو او ددغه جنایتونو د پلټنې په اړه هم خبرې شوې دي او استرالیا ددې قضیو د څېړلو په برخه کې د ځينو پرمختګونو خبر ورکړی دی.