اسلام اباد کې نیول شوي افغانان تر پلټنو وروسته بېرته خوشې شوي

تېره شپه ناوخته پاکستاني پولیسو د دغه هېواد په پلازمېنه اسلام اباد کې تر شلو ډېر افغانان نیولي او له پلټنو وروسته یې بېرته خوشي کړي دي. پولیسو یاد عملیات د اسلام اباد د بهاره کهو سیمې په شارجه پلازا کې په داسې مهال کړي چې ټول په خپلو خونو کې ویده وو. له نیول شویو کسانو خبریال احمد فیروز ایثار ویلي، تلاشي کوونکو چې ټول نارینه وو د کورونو پلټنې پر مهال له ښځو سره ناوړه او له تاوتریخوالي ډک چلند کاوه. هغه وايي هغوی د تلاشۍ پر مهال له افغانانو پاسپورټ او د اړيکې نیولو وسایل اخيستل او په دې اړه چې ولې يې د شپې په دغه وخت کې له احوال ورکولو پرته کورونو ته ننوتل څه نه دي ویلي. د ایثار په خبره، پولیسو تر شلو ډېر افغانان چې په شارجه پلازا کې اوسېږي له خپلو کورونو وايستل او په موټر کې يې د پولیسو امریت ته بوتلل. دغه راز د پاکستان پریس کلب غړى قمر يوسفزی وايي چي پوليسو يو شمېر افغانان نیولي وو چې له پلټنو وروسته يې بېرته راخوشي کړي دي. له بلي خوا پولیسو ويلي چي د دغو عملياتو موخه د افغان کورنيو د اسنادو چک کول و.