سره له دې چې امریکایي چارواکي له افغانستانه د خپلو سرتېرو پر ایستلو ټینګار کوي، خو افغان چارواکی ډاډه دي چې بهرني ځواکونه له افغانستان څخه نه وځي. پرون د افغانستان د ملي دفاع وزارت سرپرست او نوماند وزیر ولسي جرګې ته په خپلو خبرو کې وویل، ډاډه دی چې بهرني په تېره امریکایي عسکر په بشپړه توګه له افغانستان څخه نه وځي، بلکې په شمېر کې به یې ډېروالی راشي. هغه همدا راز ویلي ډاډه نه دی چې د دوحې د سولې مذاکرات دې یوې پایلې ته ورسېږي. بلخوا امریکایي چارواکي بیا ټینګار کوي چې له افغانستانه به خپل سرتېري وباسي، ناټو بیا د دې اقدام په اړه خبرداری هم ورکړی دی.
له څو ورځو راهیسې په بهرنیو، په تېره په امریکایي رسنیو کې له افغانستانه د امریکایي عسکرو د ایستلو مسئله توده ده. امریکایي رسنیو تازه راپور ورکړی چې د امریکا ولسمشر ډونالډ ټرمپ به په نږدې ورځو کې له افغانستانه د ټولو سرتېرو د ایستلو اعلان وکړي. تر دې اعلان وروسته به پنټاګون د راتلونکي میلادي کال د جنورۍ تر ۱۵مې ټول امریکایي عسکر له افغانستانه وباسي او امریکا ته به یې رسوي. دا هغه مهال دی چې د ټرمپ د واک پای ته رسېدو ته به یوازې پنځه ورځې پاتې وي. ځينې امریکایي رسنۍ بیا وایي چې ټرمپ په دې تړاو تیار فرمان لاسلیک کړی، خو پنټاګون ته یې نه دی سپارلی. د پنټاګون چارواکي بیا وایي، دوی یوازې د ټرمپ امر ته په تمه دي او تر هغه وروسته به په چټکه توګه د سرتېرو ایستل پيل کړي.
دلته په افغانستان کې بیا د ملي دفاع سرپرست وزیر وایي، هېڅ داسې نښه نښانه یې نه ده لیدلې چې وښيي امریکایي ځواکونه له افغانستانه وځي. د ده په خبره، بهرني ځواکونه له افغانستان څخه نه وځي او په دې تړاو هېڅ نښه نښانه ده ترسترګو شوې، بلکې د دې احتمال شته چې د دغو ځواکونو شمېر تر دې هم ډېر شي. اسدالله خالد چې پرون یې د ولسي جرګې غړو ته د باور رایې اخیستو لپاره خپل پروګرامونه تشریح کول، وویل: ((زه ډاډه یم، ستاسې د دفاع د وزیر په توګه زه ډاډه یم چې بهرنیان له افغانستان څخه نه وځي. دا سمه ده د شمېرو په برخه کې به تفاوتونه وي، خو په بشپړه توګه بهرني په تېره بیا امریکایي عسکر له افغانستان څخه نه وځي. هېڅ داسې نښې نښانې نه لیدل کېږي، برعکس د دې امکان شته چې سرتېري دلته ډېر شي)).
اسدالله خالد همدا راز وایي، سره له دې چې بهرني ځواکونه به له افغانستان څخه نه وځي، خو که دوی وځي هم، افغان پوځ له خپل هېواد د دفاع او د ترهګرو پر وړاندې د مبارزې وړتیا لري. د خالد په خبره، دمګړۍ په افغانستان کې ۹۶ سلنه عملیات په خپله د افغان ځواکونو له لوري ترسره کېږي او یوازې په څلور سلنه مواردو کې له بهرنیو ځواکونو د هوایي عملیاتو په برخه کې مرسته غوښتل کېږي. خالد دغه راز وویل چې په راتلونکي کال کې د افغان پوځ د لا پیاوړتیا، د لا ډېرو ولسوالیو د نیولو او د ترهګرو پر ضد د لا کوټلو عملیاتو پلان لري. خالد دغه راز وايي، ډاډه نه دی چې د سولې خبرې به یوې پایلې ته ورسېږي؛ ځکه طالبان پر خپل دريځ ولاړ دي، خو دی ټینګار کوي چې که سوله راځي، نو د افغانستان ملي اردو به د دې سولې او اوربند ساتنه کوي.
بلخوا د ناټو عمومي منشي ینس سټولټنبرګ چې تازه یې د امریکا د دفاع له نوي سرپرست وزیر سره پر بېلابېلو مسایلو خبرې کړې دي، وایي چې له افغانستانه به په بېړه د سرتېرو ایستل ستره بیه ولري. نوموړي ټینګار کړی چې په افغانستان کې به د ترهګرو تر ختمولو پورې د دوی سرتېري حاضر وي؛ ځکه نه غواړي ترهګرې ډلې له فرصت په استفادې په افغانستان کې د پښې ځای پیدا کړي او نړیوال امنیت ته خطرونه جوړ کړي. یوازې ناټو نه، بلکې په امریکايي حکومت کې هم ګڼ کسان له افغانستانه د ټولو سرتېرو د ایستلو مخالف دي او په دې اړه د ټرمپ عجولانه پرېکړه خطرناکه بولي.
