امریکا: له مذاکراتو سره هممهاله د بشري حقونو نقض روان دی

په افغانستان کې له بشري حقونو سرغړونې ډېرې شوې دي. په نړۍ کې د بشري حقونو د وضعیت په اړه د امریکا د بهرنیو چارو وزارت له لوري په خپاره شوي راپور کې راغلي چې په افغانستان کې د بشري حقونو وضعیت خراب دی او سرغړونې ډېرې شوې دي. سرچینه د حکومت او طالبانو په نښتو کې ملکي مرګ ژوبله، د ملکي وګړو ځورول، هدفي بریدونه، د حکومتي ځواکونو په عملیاتو او یا نښتو کې د ملکیانو مرګ ژوبله، انساني قاچاق، اداري فساد او له کمعمره ځوانانو د جګړې په لیکو کې کار اخیستل په افغانستان کې له بشري حقونو مهمې سرغړونې بولي. د امریکا د بهرنیو چارو وزارت په خپل راپور کې وایي، سره له دې چې په دوحه کې د سولې خبرې روانې دي خو په افغانستان کې د جګړو او نښتو له امله د بشري حقونو جدي او ښکاره نقض روان دی.